தஞ்சாவூர்: ரயில் மறியல் போராட்டம் தொடர்பான வழக்கில் இருந்து, தி.மு.க. மாவட்ட செயலாளரும் திருவையாறு சட்டமன்ற உறுப்பினருமான துரை. சந்திரசேகரனை விடுதலை செய்து தஞ்சாவூர் நீதிமன்றம் தீர்ப்பளித்துள்ளது.
கடந்த 2017-ம் ஆண்டு ஜனவரி 20-ம் தேதி, ஜல்லிக்கட்டுக்கு விதிக்கப்பட்ட தடையை நீக்க வலியுறுத்தியும், மத்திய அரசை கண்டித்தும் தஞ்சாவூர் ரயில் நிலையத்தில் தி.மு.க. சார்பில் மறியல் போராட்டம் நடைபெற்றது. துரை. சந்திரசேகரன் தலைமையில் நடைபெற்ற இந்த போராட்டத்தில், மயிலாடுதுறை - திருச்சி பயணிகள் ரயிலை மறித்ததாக, அவரும் மேலும் 179 நபர்களும் மீது வழக்குப்பதிவு செய்யப்பட்டது.
இந்த வழக்கு, தஞ்சாவூரில் உள்ள சட்டமன்ற மற்றும் நாடாளுமன்ற உறுப்பினர்கள் மீதான வழக்குகளை விசாரிக்கும் சிறப்பு நீதிமன்றத்தில் நடைபெற்று வந்தது. இந்த வழக்கின் விசாரணைக்காக எம்.எல்.ஏ. துரை. சந்திரசேகரன் நீதிமன்றத்தில் ஆஜரானார். அவரது தரப்பில் வழக்கறிஞர்கள் ஆர். சண்முகசுந்தரம், ஆர். அன்பழகன் மற்றும் எஸ். ஜெயச்சந்திரன் ஆகியோர் ஆஜராகி வாதாடினர்.
வழக்கை விசாரித்த நீதிபதி கனிமொழி, போதிய ஆதாரங்கள் இல்லாத காரணத்தால், துரை. சந்திரசேகரன் எம்.எல்.ஏ.வை வழக்கிலிருந்து விடுவித்து உத்தரவிட்டார்.









