திண்டுக்கல் மாவட்டம் வத்தலகுண்டு அடுத்த விருவீடு அருகே நிகழ்ந்த கோர விபத்தில், தனியார் மினி பேருந்து மோதி மாற்றுத்திறனாளி உள்பட இரண்டு பேர் பரிதாபமாக உயிரிழந்தனர். இச்சம்பவம் அப்பகுதியில் பெரும் சோகத்தை ஏற்படுத்தியுள்ளது.
வத்தலகுண்டு அடுத்த விருவீடு அருகே உள்ள கோனியம்பட்டியைச் சேர்ந்த மாற்றுத்திறனாளி விஜய் (27) மற்றும் அதே ஊரைச் சேர்ந்த செங்கல் சூளை தொழிலாளி பாண்டியராஜன் (26) ஆகிய இருவரும் இருசக்கர வாகனத்தில் உசிலம்பட்டி சாலையில் இருந்து வத்தலகுண்டு நோக்கிச் சென்று கொண்டிருந்தனர். இவர்களது இருசக்கர வாகனத்தை மாற்றுத்திறனாளி விஜய் இயக்கியுள்ளார்.
மீனாட்சிபுரம் பிரிவு அருகே அவர்கள் சென்று கொண்டிருந்தபோது, வத்தலகுண்டு பகுதியில் இருந்து விருவீடு நோக்கிச் சென்ற தனியார் மில்லுக்குச் சொந்தமான மினி பேருந்து எதிர்பாராதவிதமாக அவர்கள் மீது மோதியுள்ளது. இந்த விபத்தில் செங்கல் சூளை தொழிலாளி பாண்டியராஜன் சம்பவ இடத்திலேயே உயிரிழந்தார்.
கடுமையான காயங்களுடன் உயிருக்குப் போராடிக்கொண்டிருந்த மாற்றுத்திறனாளி விஜய் மீட்கப்பட்டு, சிகிச்சைக்காக வத்தலகுண்டு அரசு மருத்துவமனைக்குக் கொண்டு செல்லப்பட்டார். அங்கு அவருக்குத் தீவிர சிகிச்சை அளிக்கப்பட்ட போதிலும், சிகிச்சை பலனின்றி அவரும் பரிதாபமாக உயிரிழந்தார்.
இந்த விபத்து குறித்து தகவல் அறிந்த விருவீடு காவல் நிலைய சார்பு ஆய்வாளர் பிரான்சின் தீபா வழக்குப்பதிவு செய்து தீவிர விசாரணை நடத்தி வருகிறார். தனியார் மில் மினி பேருந்து மோதி இரண்டு பேர் உயிரிழந்த சம்பவம் அப்பகுதி மக்களிடையே பெரும் அதிர்ச்சியையும் சோகத்தையும் ஏற்படுத்தியுள்ளது.









