திண்டுக்கல் மாவட்டம், ஆத்தூர் ஒன்றியம் சித்தரேவு ஊராட்சி மன்ற அலுவலகத்தை தமிழக வெற்றி கழகத்தினர் பூட்டி போராட்டத்தில் ஈடுபட்டதால் அப்பகுதியில் பெரும் பரபரப்பு ஏற்பட்டது.
சித்தரேவு ஊராட்சியில் பணியாற்றும் பம்பு ஆப்ரேட்டர்கள், ஆளுங்கட்சியினரை அவதூறாகப் பேசுவதாகவும், முறையற்ற செயல்களில் ஈடுபடுவதாகவும் குற்றம் சாட்டி, தமிழக வெற்றி கழக நிர்வாகிகள் இந்த திடீர் போராட்டத்தை முன்னெடுத்தனர். ஊராட்சி அலுவலகத்தின் நுழைவு வாயிலைப் பூட்டி அவர்கள் நடத்திய இந்த போராட்டத்தால், அன்றாட அலுவலகப் பணிகள் கடுமையாகப் பாதிக்கப்பட்டன.
தகவலறிந்து சம்பவ இடத்திற்கு வந்த அதிகாரிகள், போராட்டத்தில் ஈடுபட்டவர்களுடன் பேச்சுவார்த்தை நடத்தினர். இந்த விவகாரத்தில் சம்பந்தப்பட்டவர்கள் மீது உரிய நடவடிக்கை எடுக்க வேண்டும் என்றும், ஊராட்சி நிர்வாகத்தில் நிலவும் குளறுபடிகளை உடனடியாகச் சரிசெய்ய வேண்டும் என்றும் பொதுமக்கள் மற்றும் தவெக நிர்வாகிகள் வலியுறுத்தியுள்ளனர்.









