மயிலாடுதுறை மாவட்டம் சீர்காழியில், காவல்துறை சார்பில் போதைக்கு எதிரான விழிப்புணர்வு மாரத்தான் ஓட்டம் நடைபெற்றது. மாவட்ட காவல் கண்காணிப்பாளர் சினேகா பிரியா கொடியசைத்து இந்த போட்டியைத் தொடங்கி வைத்தார்.
அரசூரில் தொடங்கி சீர்காழி காவல் நிலையம் வரை நடைபெற்ற 5 கிலோமீட்டர் தூர மாரத்தான் போட்டியில், பெஸ்ட் மெட்ரிக் மேல்நிலைப் பள்ளி மாணவ-மாணவிகள் மற்றும் சீர்காழி காவல்துறையினர் திரளாகக் கலந்துகொண்டனர். இதில் ஆண்கள் மற்றும் பெண்கள் பிரிவில் முதல் ஐந்து இடங்களைப் பிடித்தவர்களுக்குக் கேடயங்கள் வழங்கப்பட்டன.
குறிப்பாக, இப்போட்டியில் இரண்டாம் வகுப்பு பயிலும் மாணவி தமிழ் தர்ஷிகா, 5 கிலோமீட்டர் தூரத்தை எந்தவித சோர்வுமின்றி முழுமையாக ஓடிக் கடந்தார். அவருடன் அவரது தாயாரும் இருசக்கர வாகனத்தில் பின்தொடர்ந்து சென்று உற்சாகப்படுத்தினார். திறமையாகவும் ஆர்வத்துடனும் ஓடிய சிறுமியைப் பாராட்டிய காவல்துறையினர், அவருக்குச் சிறப்புப் பரிசு வழங்கி கவுரவித்தனர். மேலும், போட்டியில் கலந்துகொண்ட அனைவருக்கும் பாராட்டுச் சான்றிதழ்களும் பரிசுகளும் வழங்கப்பட்டன.
இந்நிகழ்வில் சீர்காழி காவல் துணை கண்காணிப்பாளர் சரவணன், காவல் ஆய்வாளர்கள் கமல்ராஜ், புயல் பாலச்சந்திரன் உள்ளிட்ட உயரதிகாரிகளும் ஏராளமான காவலர்களும் உடனிருந்தனர்.









