அரியலூர் மாவட்ட ஆட்சியர் அலுவலகக் கூட்டரங்கில் மக்கள் குறைதீர்க்கும் நாள் கூட்டம், மாவட்ட ஆட்சியர் ந.மிருணாளினி தலைமையில் நடைபெற்றது.
கூட்டத்தில், முதியோர் உதவித்தொகை, இலவச வீட்டுமனைப் பட்டா, மாற்றுத்திறனாளிகள் உதவித்தொகை, தொழில்கடன், பசுமை வீடு உள்ளிட்ட பல்வேறு கோரிக்கைகள் தொடர்பாக பொதுமக்களிடமிருந்து மொத்தம் 637 மனுக்கள் பெறப்பட்டன.
மனுக்களைப் பெற்றுக்கொண்ட மாவட்ட ஆட்சியர், அவற்றின் மீது சம்பந்தப்பட்ட துறை அதிகாரிகள் உரிய நடவடிக்கைகளை விரைந்து மேற்கொள்ள வேண்டும் என அறிவுறுத்தினார்.
மேலும், பிற்படுத்தப்பட்டோர், மிகப்பிற்படுத்தப்பட்டோர் மற்றும் சீர்மரபினர் நலத்துறை சார்பில் சிறு, குறு விவசாயிகளுக்கு நீர்ப்பாசன வசதியை ஏற்படுத்தும் வகையில் வங்கிக் கடனுடன் அரசு மானியம் வழங்கும் திட்டம் செயல்படுத்தப்பட்டு வருகிறது.
இத்திட்டத்தின் கீழ் ரூ.1 லட்சம் கடனுதவி பெற்று ஆழ்துளைக் கிணறு அமைத்த 2 பயனாளிகளுக்கு, தலா ரூ.50 ஆயிரம் அரசு மானியத்திற்கான காசோலைகளை மாவட்ட ஆட்சியர் ந.மிருணாளினி வழங்கினார்.
இந்த நிகழ்ச்சியில் மாவட்ட வருவாய் அலுவலர் க.ரா.மல்லிகா, மாவட்ட நிலை அலுவலர்கள் மற்றும் பல்வேறு துறைகளைச் சேர்ந்த அரசு அலுவலர்கள் கலந்து கொண்டனர்.









