திருநெல்வேலி மாவட்டம் தாதனூத்து பகுதியில் கல்குவாரி செயல்பட வழங்கப்பட்டுள்ள அனுமதியை உடனடியாக ரத்து செய்ய வலியுறுத்தி, கிராம மக்கள் மாவட்ட ஆட்சியர் அலுவலகம் முன்பு தர்ணா போராட்டத்தில் ஈடுபட்டனர்.
தாதனூத்து பகுதியில் பொதுமக்களின் தொடர் எதிர்ப்பையும் மீறி கல்குவாரி இயங்க அனுமதி வழங்கப்பட்டுள்ளதாக கூறப்படுகிறது. இதற்கு எதிர்ப்பு தெரிவித்தும், அந்த அனுமதியை ரத்து செய்ய வலியுறுத்தியும் தாதனூத்து கிராம மக்கள் மற்றும் தேவேந்திர குல வேளாளர் சமுதாய உறவின்முறை சார்பில் ஏராளமானோர் திரண்டு போராட்டத்தில் ஈடுபட்டனர்.
மாவட்ட ஆட்சியர் அலுவலக வளாகத்தில் தரையில் அமர்ந்து போராட்டத்தில் ஈடுபட்ட பொதுமக்கள், கல்குவாரி அனுமதி வழங்கப்பட்டதற்கு எதிராக கண்டன முழக்கங்களை எழுப்பினர்.
போராட்டத்தில் ஈடுபட்டவர்கள் கூறுகையில், பொதுமக்களின் வாழ்வாதாரம் மற்றும் குடியிருப்புப் பகுதிகளின் பாதுகாப்பை கருத்தில் கொள்ளாமல் கல்குவாரிக்கு அனுமதி வழங்கப்பட்டுள்ளதாக குற்றம்சாட்டினர். இதனால் தாதனூத்து பகுதி மக்கள் குடியிருக்க முடியாத நிலைக்கு தள்ளப்படுவதாகவும் அவர்கள் வேதனை தெரிவித்தனர்.
மேலும், கனிம வளங்களை எடுப்பதற்கு அனுமதி வழங்குவதில் கடந்த கால மற்றும் தற்போதைய ஆட்சியாளர்கள் ஒரே நிலைப்பாட்டை கொண்டிருப்பதாகவும் போராட்டக்காரர்கள் விமர்சித்தனர்.
மக்கள் வசிக்கும் பகுதிகள் மற்றும் விவசாய நிலங்களுக்கு அச்சுறுத்தலாக இருப்பதாக கூறப்படும் கல்குவாரியின் அனுமதியை உடனடியாக ரத்து செய்ய வேண்டும் என அவர்கள் வலியுறுத்தினர்.
தங்களது கோரிக்கைக்கு உரிய தீர்வு காணப்படாவிட்டால், அனைத்து தரப்பு மக்களையும் ஒருங்கிணைத்து அடுத்தகட்டமாக தொடர் போராட்டங்களை நடத்தப் போவதாகவும் தாதனூத்து கிராம மக்கள் எச்சரிக்கை விடுத்தனர்.









