புதுக்கோட்டை மாவட்டம் அறந்தாங்கி தொடங்கி கடற்கரைப் பகுதிகளான கட்டுமாவடி, மணமேல்குடி, கோட்டைப்பட்டினம், ஜெகதாப்பட்டினம், மீமிசல், தொண்டி வரை உள்ள பல்லாயிரக்கணக்கான ஹெக்டேர் நிலங்களில் நெல் மட்டுமே விவசாயம் செய்ய முடியும் என்கிற நிலையில் குறிப்பாக வானம் பார்த்த பூமியாக இருந்து வருகிறது. செய்ய வேண்டிய மழை சரியாக பெய்தால் இதே பகுதிகளில் இரண்டு போக நெல் சாகுபடியை விவசாயிகள் செய்து வந்திருக்கிறார்கள். கடந்தாண்டு மட்டுமல்லாது இந்த ஆண்டும் வானம் பொய்த்து விட்டதால் விவசாயம் கருகத் தொடங்கி இருக்கிறது. மேலும் வானத்தை நம்பி விவசாயம் செய்வதால் இப்பொழுது விவசாயிகள் நாற்று வளர்த்து நடவு செய்து நெல் விவசாயம் செய்வதை விட கோடை உழவு செய்து கோடை காலத்திலேயே நெல் விதையை விதைத்து விடுவார்கள். லேசான மழை பெய்யும் போது முளைத்து விடும். வறட்சியைத் தாங்கும் தன்மையுடைய இந்த நெற்பயிர்கள் கடும் மழை பெய்யும் போதும் தாங்கி வளரும். அதே நேரத்தில் நல்ல விளைச்சலையும் தரும் என்பதால் காலம் காலமாக இப்பகுதி விவசாயிகள் இந்த முறையைத்தான் கடைப்பிடிக்கிறார்கள். தமிழ்நாடு அரசின் வானிலை அறிக்கை ஒவ்வொரு நாளும் சொல்லும்போது எப்படியும் இன்று மழை பெய்யும் நாளை மழை பெய்யும் என்று எதிர்பார்த்து காத்திருந்த நிலையில் மேலே நாம் குறிப்பிட்டு இருக்கும் பகுதிகளில் மழையே பெய்யவில்லை. இதுவரை இருந்த ஈரத்தில் முளைத்து வளர்ந்திருந்த நெற்பயிர்கள் தற்போது கருகத் தொடங்கி இருக்கின்றன. பாதிக்குமேல் பாதிப்படைந்து விட்டன இன்னும் கொஞ்சநஞ்சம் பயிர்கள் லேசான பச்சையுடன் இருக்கின்றன. இன்று அல்லது நாளை மழை பெய்தாலும் பிழைத்துக் கொள்ளும் என்ற நிலையில் இருக்கிறது. வானம் பொய்த்து விட்டால் புதுக்கோட்டை மாவட்டமே பஞ்சத்தின் பிடியில் சிக்கிவிடும் என்ற நிலையில் இருக்கிறது.
விவசாயம்
இப்போது மழை பெய்தாலும் பிழைத்துக் கொள்ளும் நெற்பயிர்கள்!
🕒 21 நவ., 2026, 09:44 AM
⏱️ 1 நிமிடம் வாசிப்பு

📸1 / 2
🖼️அனைத்துப் புகைப்படங்கள் (2)படத்தைத் தொடவும்








