கிருஷ்ணகிரி மாவட்டம் வேப்பனப்பள்ளி மற்றும் அதன் சுற்றுவட்டாரப் பகுதிகளில் இந்த ஆண்டு கத்திரிக்காய் சாகுபடி அமோகமாக நடைபெற்றுள்ளது. இப்பகுதியில் 1,000 ஏக்கருக்கும் அதிகமான பரப்பளவில் கத்திரிக்காய் பயிரிடப்பட்டுள்ளது.
ஆந்திரப் பிரதேசத்தில் பெய்த கனமழை காரணமாக அங்கு விளைச்சல் பாதிக்கப்பட்டு, தமிழக சந்தைக்கான வரத்து குறைந்துள்ளது. இதன் காரணமாக உள்ளூர் கத்திரிக்காய்க்குச் சந்தையில் நல்ல வரவேற்பும் கிராக்கியும் ஏற்பட்டுள்ளது. கடந்த ஆண்டு கிலோ ரூ.15 முதல் ரூ.30 வரை மட்டுமே விற்பனையான நிலையில், தற்போது கிலோ ரூ.40 முதல் ரூ.50 வரை கொள்முதல் செய்யப்படுகிறது.
வேப்பனப்பள்ளிப் பகுதியிலிருந்து தினசரி 1 முதல் 1.5 டன் வரை கத்திரிக்காய் சென்னை, மதுரை, கோவை உள்ளிட்ட முக்கிய தமிழக மாவட்டங்களுக்கும், கேரளா, கர்நாடகா, ஆந்திரா உள்ளிட்ட அண்டை மாநிலங்களுக்கும் ஏற்றுமதி செய்யப்படுகிறது. இந்த விலை உயர்வு தங்களுக்குக் கடந்த ஆண்டு ஏற்பட்ட நஷ்டத்தை முழுமையாக ஈடுகட்ட உதவியுள்ளதாக விவசாயிகள் மகிழ்ச்சி தெரிவித்துள்ளனர்.









