திருச்சி மாவட்டம், மணப்பாறை நகராட்சிக்கு உட்பட்ட 16-வது வார்டு சாய்நகரில் சுமார் 110 குடும்பங்கள் வசித்து வருகின்றன. இப்பகுதியில் பொதுமக்களின் கழிவுநீர் செல்லும் கால்வாயை தனிநபர் ஒருவர் அடைத்ததால், தேங்கியுள்ள கழிவுநீரால் அப்பகுதியில் தொற்றுநோய் பரவும் அபாயம் ஏற்பட்டுள்ளது.
இதுகுறித்து பலமுறை நகராட்சி அதிகாரிகளுக்கு கோரிக்கை விடுத்தும் உரிய நடவடிக்கை எடுக்கப்படவில்லை எனக் கூறப்படுகிறது. இதனைக் கண்டித்து, இந்திய கம்யூனிஸ்ட் கட்சி (மார்க்சிஸ்ட்-லெனினிஸ்ட்) மற்றும் பொதுமக்கள் இணைந்து நாளை காலை 11 மணிக்கு நகராட்சி அலுவலகம் முன்பு தர்ணா போராட்டம் நடத்தப்படும் என அறிவித்திருந்தனர்.
இதனைத் தொடர்ந்து, நகராட்சி அதிகாரிகளும் காவல்துறையினரும் உடனடியாகத் தலையிட்டு, சம்பந்தப்பட்ட நபரின் மதில்சுவரை உடைத்து தேங்கிய கழிவுநீரை வெளியேற்றினர். மேலும், CPI(ML) கட்சித் தலைவர்களைத் தொடர்பு கொண்ட அதிகாரிகள், ஒரு வாரத்திற்குள் இதற்கு நிரந்தரத் தீர்வு காண நடவடிக்கை எடுக்கப்படும் என்றும், வரும் 25.11.2026 புதன்கிழமை அன்று அமைதிப் பேச்சுவார்த்தை நடத்தி தீர்வு காணப்படும் என்றும் உத்தரவாதம் அளித்தனர். இதனையடுத்து, தற்காலிகமாகப் போராட்டம் வாபஸ் பெறப்பட்டுள்ளது.









