நாமக்கல் மாவட்டம் ராசிபுரம் அடுத்த அத்தனூர் பகுதியில் உள்ள திருமண மண்டபத்தில் நிறுத்தப்பட்டிருந்த மேனேஜரின் மின்சார வாகனத்தைத் திறந்து பணம் திருட முயன்ற மர்ம நபரை செக்யூரிட்டி ஊழியர் துரத்திய சம்பவம் அப்பகுதியில் பரபரப்பை ஏற்படுத்தியுள்ளது.
ராசிபுரம் அடுத்த அத்தனூர் பகுதியில் அமைந்துள்ள அஞ்சலி திருமண மண்டபத்தில் கடந்த நவம்பர் 14 அன்று திருமண நிகழ்ச்சி ஒன்று நடைபெற்றுள்ளது. இந்த மண்டபத்தில் கடந்த ஐந்து ஆண்டுகளாக மேனேஜராகப் பணியாற்றி வரும் செந்தில், தனது டிவிஎஸ் ஐக்யூப் (TN 90 K 5648) மின்சார இருசக்கர வாகனத்தை மண்டபத்திற்கு வெளியே நிறுத்திவிட்டு, உள்ளே திருமணப் பணிகளைக் கவனித்து வந்துள்ளார்.
அப்போது வாகனங்கள் நிறுத்தும் இடத்தில் பாதுகாப்புப் பணியில் ஈடுபட்டிருந்த ரவிச்சந்திரன் மற்றும் அவருடன் இருந்தவர்கள் வாகனங்களை ஒழுங்குபடுத்தும் பணியில் ஈடுபட்டுள்ளனர். அப்போது மர்ம நபர் ஒருவர், செந்திலின் மின்சார வாகனத்தைத் திறந்து உள்ளே இருந்த பணத்தை எடுக்க முயன்றுள்ளார். இதனைக் கவனித்த பாதுகாப்புப் பணியாளர் ரவிச்சந்திரன், உடனடியாக அந்த நபரிடம் சென்று விசாரித்துள்ளார்.
விசாரணையின்போது, தான் திப்பம்பட்டியைச் சேர்ந்த சுப்பிரமணி என்பவரின் மகன் அஜித்குமார் என்றும், திருமண நிகழ்ச்சிக்கு வந்துள்ளதாகவும் அந்த நபர் தெரிவித்துள்ளார். மேலும், அந்த வாகனம் யாருடையது என ரவிச்சந்திரன் கேட்டபோது, அது தன்னுடைய வாகனம் என அவர் முன்னுக்குப்பின் முரணாகப் பொய் கூறியுள்ளார். இதனால் சந்தேகமடைந்த ரவிச்சந்திரன், இது மண்டப மேனேஜருக்குச் சொந்தமான வாகனம் எனக் கூறியதும், அந்த நபர் அங்கிருந்து தப்பியோட முயன்றார்.
உடனே ரவிச்சந்திரன் அவரைப் பிடிப்பதற்காகத் துரத்திச் சென்றுள்ளார். ஆனால், அந்த நபர் அருகில் இருந்த ரயில்வே தண்டவாளத்தில் இறங்கி இருட்டில் ஓடி மறைந்துவிட்டதால் அவரைப் பிடிக்க முடியவில்லை. இந்தச் சம்பவம் குறித்து மேனேஜர் செந்தில் உடனடியாக வாகனத்தைச் சோதனை செய்தபோது, அதில் வைக்கப்பட்டிருந்த 200 ரூபாய் பணம் திருடுபோயிருப்பது தெரியவந்தது.
திருமண நிகழ்ச்சிக்கான பணிகள் காரணமாக அன்றைய தினம் காவல் நிலையம் செல்ல முடியாத நிலையில், மறுநாள் காலை காவல் நிலையத்தில் எழுத்துப்பூர்வமாகப் புகார் அளிக்கப்பட்டது. தனது வாகனத்தைத் திறந்து பணத்தைத் திருடிய மர்ம நபரைக் கண்டறிந்து உரிய நடவடிக்கை எடுக்க வேண்டும் என்று அப்புகாரில் கோரிக்கை விடுக்கப்பட்டுள்ளது. திருமண மண்டபத்திற்கு வெளியே நடைபெற்ற இந்தத் திருட்டு முயற்சி சம்பவம் அப்பகுதியில் பெரும் பரபரப்பை ஏற்படுத்தியுள்ளது.









