நாமக்கல் மாவட்டம் எலச்சிபாளையம் ஒன்றியப் பகுதிக்கு உட்பட்ட பெரியமலை மற்றும் குமாரமங்கலம் பகுதிகளில் வசிக்கும் குறவன் பழங்குடியின மக்கள், இலவச வீட்டு மனைப் பட்டா கோரி மாவட்ட ஆட்சியரிடம் மனு அளித்துள்ளனர்.
இப்பகுதியில் 50-க்கும் மேற்பட்ட குறவர் பழங்குடியின குடும்பத்தினர் கடந்த 60 ஆண்டுகளுக்கு மேலாக வசித்து வருகின்றனர். இவர்களுக்குப் போதிய கல்வி மற்றும் அடிப்படை வசதிகள் கிடைக்கவில்லை என்றும், தற்போது அவர்கள் வாடகை வீட்டில் வசித்து வருவதாகவும் தெரிவிக்கப்பட்டுள்ளது.
இலவச மனைப் பட்டா கேட்டு மாவட்ட ஆட்சியரிடம் பலமுறை மனு அளித்தும் இதுவரை எந்தவித நடவடிக்கையும் எடுக்கப்படாத நிலையில், அப்பகுதியைச் சேர்ந்த மக்கள் மீண்டும் மாவட்ட ஆட்சியரை நேரில் சந்தித்து மனு அளித்தனர்.
பின்னர் செய்தியாளர்களிடம் பேசிய அவர்கள், கடந்த 40 ஆண்டுகளுக்கு மேலாக அதிகாரிகளிடமும், சட்டமன்ற உறுப்பினர்கள் மற்றும் அமைச்சர்களிடாகவும் கோரிக்கை விடுத்தும் இதுவரை பட்டா வழங்கப்படவில்லை என்று வேதனை தெரிவித்தனர். தற்போது தங்கள் வாழ்வாதாரத்தை மேம்படுத்தவும், கல்வி வளர்ச்சியைக் கருத்தில் கொண்டும் உடனடியாக இலவச வீட்டு மனை பட்டா வழங்க ஏற்பாடு செய்ய வேண்டும் என்று அவர்கள் மாவட்ட ஆட்சியரிடம் கோரிக்கை விடுத்துள்ளனர்.









