திருப்பூரில் லேடிஸ் ஹாஸ்டல் திடீரென காலி செய்யப்பட்டதால், அங்கு தங்கியிருந்த பெண்ணின் பொருள்கள் சாலையில் வீசப்பட்ட சம்பவம் பெரும் பரபரப்பை ஏற்படுத்தியுள்ளது. இதுகுறித்து திருப்பூர் வடக்கு காவல் நிலைய போலீசார் விசாரணை நடத்தி வருகின்றனர்.
திருப்பூரில் வெளிமாநிலங்கள் மற்றும் வெளிமாவட்டங்களைச் சேர்ந்த ஏராளமானோர் தங்கி பணியாற்றி வருகின்றனர். இவர்களில் பெண்களின் பாதுகாப்பைக் கருதி, தனியார் தங்கும் விடுதிகளில் (லேடிஸ் ஹாஸ்டல்) தங்கி பணிக்கு சென்று வருவது வழக்கம். அந்த வகையில், பங்களா ஸ்டாப் பகுதியில் உள்ள தனியார் பெண்கள் தங்கும் விடுதியில் வேலூர் மாவட்டத்தைச் சேர்ந்த சுந்தரி என்பவர் கடந்த ஐந்து ஆண்டுகளாகத் தங்கி வேலை பார்த்து வந்துள்ளார்.
இந்த நிலையில், சம்பந்தப்பட்ட ஹாஸ்டலை வேறு இடத்திற்கு மாற்றுவதற்காக, விடுதியை உடனடியாகக் காலி செய்யுமாறு அதன் நிர்வாகம் தரப்பில் குறைந்த நாட்களுக்கு முன்பு தகவல் தெரிவிக்கப்பட்டுள்ளது. குறுகிய காலத்தில் உடனடியாகப் புதிய இடத்திற்கு மாற முடியாத சூழல் இருந்ததால், மேலும் இரண்டு நாட்கள் மட்டும் தங்கிொள்ள அனுமதிக்குமாறு சுந்தரி கேட்டுள்ளார். ஆனால், அதற்கு ஹாஸ்டல் நிர்வாகம் அனுமதி மறுத்துள்ளது.
இதற்கிடையே, சுந்தரி வேலைக்குச் சென்றிருந்த நேரத்தில், ஹாஸ்டல் நிர்வாகிகளும் கட்டிடத்தின் உரிமையாளரும் இணைந்து அவரது உடைமைகள் மற்றும் பொருள்களைச் சாலையில் வீசிவிட்டு, கட்டிடத்தைப் பூட்டிவிட்டுச் சென்றுள்ளனர். இதனால் அதிர்ச்சியடைந்த அந்தப் பெண், வேறு வழியின்றி காவல்துறைக்குத் தகவல் அளித்துள்ளார்.
தகவலறிந்து வந்த திருப்பூர் வடக்கு காவல் நிலைய போலீசார், கட்டிடத்தைப் பூட்டிச் சென்ற ஹாஸ்டல் நிர்வாகி பூங்கொடி என்பவரிடம் விசாரணை நடத்தி வருகின்றனர். இதற்கிடையே, பாதிக்கப்பட்ட பெண்ணுக்கு இரவு தங்குவதற்குப் பாதுகாப்பான ஏற்பாடுகளைக் காவல்துறையினர் செய்து கொடுத்தனர். இச்சம்பவத்தால் அப்பகுதியில் சிறிது நேரம் பரபரப்பு ஏற்பட்டது.









