வேலூர் மாவட்டம், பள்ளிகொண்டா பகுதியில் கடந்த 2009-ம் ஆண்டு நடந்த திருட்டு வழக்கில், 11 ஆண்டுகளாகத் தலைமறைவாக இருந்த பிடிவாரண்ட் குற்றவாளியை காவல்துறையினர் அதிரடியாகக் கைது செய்துள்ளனர்.
வேலூர் மாவட்டம், பள்ளிகொண்டா பகுதியைச் சேர்ந்தவர் ரியாஸ் அகமத். இவரது வீட்டில் கடந்த 2009-ம் ஆண்டு நிகழ்த்தப்பட்ட திருட்டுச் சம்பவத்தில், கம்ப்யூட்டர், டிவிடி பிளேயர் உள்ளிட்ட பல்வேறு மின்னணுப் பொருட்கள் திருடப்பட்டன. இதுகுறித்து ரியாஸ் அகமத் அளித்த புகாரின்பேரில் வழக்குப்பதிவு செய்த பள்ளிகொண்டா காவல் நிலையக் காவல்துறையினர் விசாரணை மேற்கொண்டனர்.
இந்தத் வழக்கில் தொடர்புடைய திருப்பத்தூர் ராஜிவ் காந்தி நகரைச் சேர்ந்த பாபு என்கின்ற அகமத் பாஷா (43) என்பவரைக் காவல்துறையினர் கைது செய்து சிறையில் அடைத்தனர். பின்னர், நீதிமன்றத்தில் ஜாமீன் பெற்று வெளியே வந்த அகமத் பாஷா, 2015-ம் ஆண்டு வரை நீதிமன்றத்தில் முறையாக ஆஜராகி வந்தார். அதன்பிறகு, நீதிமன்ற விசாரணைகளுக்கு ஆஜராகாமல் அவர் தலைமறைவானார்.
விசாரணைக்கு ஆஜராகாத அகமத் பாஷாவைக் கைது செய்ய உத்தரவிட்டு, கடந்த 2015-ம் ஆண்டு வேலூர் நீதித்துறை நடுவர் நீதிமன்றம் எண்-5 மூலமாகப் பிடிவாரண்ட் பிறப்பிக்கப்பட்டது. அதனைத் தொடர்ந்து, கடந்த 2025-ம ஆண்டும் நீதிமன்றத்தால் மீண்டும் பிடிவாரண்ட் வழங்கப்பட்டது. இதற்கிடையே, தலைமறைவாக இருந்த அகமத் பாஷா தனது சொந்த வீட்டிலேயே பதுங்கியிருப்பதாகப் பள்ளிகொண்டா காவல் நிலையக் காவல்துறையினருக்கு இரகசியத் தகவல் கிடைத்தது.
இந்தத் தகவலின் அடிப்படையில் விரைந்து சென்ற காவல்துறையினர், வீட்டில் பதுங்கியிருந்த அகமத் பாஷாவை மடக்கிப் பிடித்துக் கைது செய்தனர். அதனைத் தொடர்ந்து, அவரை நீதிமன்றத்தில் ஆஜர்படுத்திச் சிறையில் அடைத்தனர். 11 ஆண்டுகளாகத் தலைமறைவாக இருந்த நபர் கைது செய்யப்பட்டுள்ள சம்பவம் அப்பகுதியில் பரபரப்பை ஏற்படுத்தியுள்ளது.









