மயிலாடுதுறை மாவட்டம் சீர்காழி செங்கமேடு பகுதியில், உரிமை குரல் ஓட்டுநர் தொழிற்சங்கத்தின் மயிலாடுதுறை மாவட்ட கலந்தாய்வுக் கூட்டம் நடைபெற்றது. மாவட்டப் பொருளாளர் முத்துராஜ் தலைமையில் நடைபெற்ற இக்கூட்டத்தில், மாநிலப் பொதுச் செயலாளர் சபரிநாதன் மற்றும் மாநிலப் பொருளாளர் காளிமுத்து ஆகியோர் சிறப்பு விருந்தினர்களாகக் கலந்துகொண்டு சிறப்புரையாற்றினர்.
இந்தக் கூட்டத்தில் பல்வேறு முக்கிய கோரிக்கைகள் வலியுறுத்தப்பட்டு தீர்மானங்கள் நிறைவேற்றப்பட்டன. குறிப்பாக, கடந்த 14 ஆண்டுகளாக உயர்த்தப்படாமல் இருந்த ஆட்டோ மீட்டர் கட்டணத்தை உயர்த்திய தமிழக அரசுக்கு கூட்டத்தில் நன்றி தெரிவிக்கப்பட்டது. இதேபோன்று, கால் டாக்ஸி வாகனங்களுக்கும் மீட்டர் கட்டணத்தை உயர்த்தி வழங்க அரசு நடவடிக்கை எடுக்க வேண்டும் என கோரிக்கை விடுக்கப்பட்டது.
மேலும், மேக்ஸி கேப் வாகனங்களுக்கான இருக்கை அனுமதியை (Seat Permit) உயர்த்தி வழங்க வேண்டும் என்றும், சொந்தப் பயன்பாட்டு வாகனங்களை பொதுப்போக்குவரத்திற்குப் பயன்படுத்துவோர் மீது கடுமையான நடவடிக்கை எடுக்கப்பட வேண்டும் என்றும் வலியுறுத்தப்பட்டது. குறிப்பாக, மாவட்ட எல்லைப் பகுதிகள் மற்றும் சோதனைச் சாவடிகளில், மேக்ஸி கேப் வாகனங்களில் அதிக இருக்கைகள் இருப்பதாகக் கூறி வழிப்பறி கொள்ளையைப் போல அதிகளவில் லஞ்சம் வசூலிக்கப்படுவதாகக் குற்றம்சாட்டப்பட்டது. இதனை அரசு உடனடியாகத் தடை செய்ய வேண்டும் என்றும் ஓட்டுநர் சங்கம் சார்பில் தீவிரமாக வலியுறுத்தப்பட்டது.









