மயிலாடுதுறை மாவட்டம் சீர்காழி அருகே கூரை வீடு தீப்பற்றி எரிந்த விபத்தில் மூதாட்டி பரிதாபமாக உயிரிழந்தார்.
சீர்காழி தாலுக்கா கீராநல்லூர் பள்ளிவாசல் தெருவைச் சேர்ந்தவர் நூர்ஜகான் (60). இவரது கணவர் அப்துல் ஜலீஸ் 15 ஆண்டுகளுக்கு முன்பு இறந்துவிட்டார். இவர்களின் மகள் நிஷா பேகம் (44) என்பவருக்கு திருமணமாகி, கணவர் சாதிக் பாட்ஷாவுடன் ஊட்டியில் வசித்து வருகிறார். இந்நிலையில், உறவினர்களின் உதவியுடன் கீராநல்லூரில் உள்ள கூரை வீட்டில் நூர்ஜகான் தனியாக வசித்து வந்துள்ளார்.
நேற்று இரவு சமைத்து சாப்பிட்டுவிட்டு அவர் தூங்கச் சென்றுள்ளார். இந்நிலையில், இன்று அதிகாலை 3 மணியளவில் அலறல் சத்தம் கேட்டு அக்கம் பக்கத்தினர் வந்து பார்த்தபோது, நூர்ஜகானின் வீடு தீப்பற்றி எரிந்துகொண்டிருந்தது. வீட்டின் கதவு உள்பக்கம் தாழிடப்பட்டிருந்ததால், நூர்ஜகானை உடனடியாக மீட்க முடியவில்லை.
தகவலறிந்து விரைந்து வந்த சீர்காழி தீயணைப்பு மற்றும் மீட்புப் படையினர் தீயை அணைக்கும் முயற்சியில் ஈடுபட்டனர். இருப்பினும், தீயணைப்பு வீரர்கள் வருவதற்குள் வீடு முழுமையாக எரிந்து சாம்பலானதுடன், தீயில் கருகி நூர்ஜகான் சம்பவ இடத்திலேயே உயிரிழந்தார்.
இந்த விபத்துக்கான காரணம் குறித்து சீர்காழி போலீசார் வழக்குப்பதிவு செய்து விசாரணை நடத்தி வருகின்றனர். இச்சம்பவம் அப்பகுதி மக்களிடையே பெரும் சோகத்தை ஏற்படுத்தியுள்ளது.









