கரூர் பிரசித்தி பெற்ற கல்யாண பசுபதீஸ்வரர் கோவிலில் முருகப்பெருமானின் சூரசம்ஹார விழா கோலாகலமாக நடைபெற்றது. இதில் திரளான பக்தர்கள் கலந்து கொண்டு சாமி தரிசனம் செய்தனர்.
விழாவை முன்னிட்டு, கோவிலின் உட்பிரகாரத்தில் ஆட்டுக்கிடா வாகனத்தில் முருகப்பெருமான் சிறப்பு அலங்காரத்தில் எழுந்தருளினார். அவருக்கு பல்வேறு வண்ண மலர்களால் அலங்காரம் செய்யப்பட்டு, தீபாராதனை காண்பிக்கப்பட்டது. தொடர்ந்து, சூரபத்மன் கேடயம் மற்றும் வாள் உள்ளிட்ட ஆயுதங்களுடன் போருக்கு தயாராகும் வகையில் எழுந்தருளினார்.
நிகழ்ச்சியின் முக்கிய அம்சமாக, முருகப்பெருமானுக்கும் சூரபத்மனுக்கும் இடையே போர் நடப்பதை விளக்கும் வகையில் இருவரது பல்லக்குகளும் கோவில் வளாகத்தில் வலம் வந்தன. இறுதியில் தீமையை அழித்து தர்மத்தை நிலைநாட்டும் விதமாக, முருகப்பெருமான் தனது வேலால் சூரபத்மனை வதம் செய்யும் ஐதீக நிகழ்வு நடைபெற்றது.
இந்த ஆன்மீக நிகழ்வின்போது பக்தர்கள் 'வெற்றிவேல் முருகனுக்கு அரோகரா, வீரவேல் முருகனுக்கு அரோகரா' என்ற பக்தி முழக்கங்களை எழுப்பினர். மேலும், கோவிலின் நான்கு பிரகாரங்களிலும் பானுகோபன், கஜமுகன், சிங்கமுகன் உள்ளிட்ட அசுரர்களை வதம் செய்யும் நிகழ்ச்சிகளும் விமரிசையாக நடத்தப்பட்டன. விழாவின் நிறைவில் சிறப்பு பூஜைகள் நடைபெற்றன. இதில் கரூர் மற்றும் அதன் சுற்றுவட்டாரப் பகுதிகளைச் சேர்ந்த ஏராளமான பக்தர்கள் பங்கேற்று அருள் பெற்றனர்.









