தீபாவளி பண்டிகையை முன்னிட்டு, மதுரை மாட்டுத்தாவணி ஒருங்கிணைந்த மலர் சந்தையில் மல்லிகைப் பூவின் விலை கிடுகிடுவென உயர்ந்துள்ளது. நேற்றைய விலையை விட ரூ.400 அதிகரித்து, இன்று ஒரு கிலோ மல்லிகைப்பூ ரூ.1,800-க்கு விற்பனை செய்யப்படுகிறது.
பண்டிகை காலங்களில் பூக்களுக்கான தேவை அதிகரித்துள்ள நிலையில், வரத்து குறைந்துள்ளதே இந்த விலை உயர்வுக்கு முக்கியக் காரணம் என்று வியாபாரிகள் தெரிவித்துள்ளனர். இதர பூக்களின் வில நிலவரப்படி, கனகாம்பரம் ஒரு கிலோ ரூ.2,000-க்கும், பிச்சி மற்றும் முல்லைப் பூக்கள் தலா ரூ.1,000-க்கும் விற்பனை செய்யப்படுகின்றன. மேலும், செவ்வந்தி, சம்பங்கி மற்றும் ரோஜா பூக்கள் தலா ரூ.150-க்கு விற்பனை செய்யப்படுகின்றன.
பல்வேறு மாவட்டங்களில் இருந்து மாட்டுத்தாவணி மலர் சந்தைக்கு பூக்களின் வரத்து குறைந்துள்ளதால், நாளையும் இதே விலை நீடிக்க வாய்ப்புள்ளதாக வியாபாரிகள் தரப்பில் கூறப்படுகிறது.









