வேலூர் மாவட்டம் பள்ளிகொண்டா காவல் ஆய்வாளர் பார்த்தசாரதி தலைமையிலான காவல்துறையினர் தீவிர ரோந்து பணியில் ஈடுபட்டிருந்தனர். அப்போது, பாலாற்றங்கரை பகுதியில் சந்தேகத்திற்கு இடமான முறையில் நின்று கொண்டிருந்த நபரிடம் விசாரணை நடத்தினர்.
அவர் வைத்திருந்த பையை சோதனை செய்ததில், அதில் விற்பனைக்காக பதுக்கி வைக்கப்பட்டிருந்தது கஞ்சா என்பது தெரியவந்தது. அதனைத் தொடர்ந்து நடத்தப்பட்ட விசாரணையில், அவர் குடியாத்தம் அடுத்த வீரிச்செட்டிபல்லி கொல்லைமேடு பகுதியைச் சேர்ந்த சின்ன கண்ணு என்பவரின் மகன் ராஜா என்ற ராஜீவ்காந்தி (43) என்பது கண்டறியப்பட்டது.
இந்த சோதனையின் முடிவில், அவரிடமிருந்து 1 கிலோ 900 கிராம் எடையுள்ள கஞ்சா பறிமுதல் செய்யப்பட்டது. இந்த சம்பவம் தொடர்பாக வழக்குப்பதிவு செய்த பள்ளிகொண்டா காவல்துறையினர், ராஜீவ்காந்தியை கைது செய்து நீதிமன்றத்தில் ஆஜர்படுத்த நடவடிக்கை எடுத்து வருகின்றனர்.









