ராமநாதபுரம் மாவட்டம் கமுதி அருகே உள்ள எருமைக்குளம் கிராமத்தில், சமீபத்தில் பெய்த தொடர் மழையால் சேதமடைந்த சாலையை சீரமைக்காததால், உடல்நலக்குறைவால் பாதிக்கப்பட்ட மூதாட்டி ஒருவரை அவரது உறவினர்கள் கட்டிலில் வைத்து தூக்கிச் சென்ற அவல நிலை ஏற்பட்டுள்ளது.
எருமைக்குளம் கிராமத்தில் அடிப்படை வசதிகள் மற்றும் சாலை வசதிகள் முறையாக செய்யப்படாததே இந்த துயரத்திற்குக் காரணம் என்று அப்பகுதி மக்கள் குற்றம்சாட்டுகின்றனர். மழைக் காலங்களில் அவசர மருத்துவத் தேவைக்குக் கூட ஆம்புலன்ஸ் வாகனம் வர முடியாத அளவிற்கு சாலைகள் குண்டும் குழியுமாக மாறிவிடுவதாக அவர்கள் வேதனை தெரிவிக்கின்றனர்.
எனவே, மாவட்ட நிர்வாகம் உடனடியாகத் தலையிட்டு சேதமடைந்த சாலையைச் சீரமைக்கத் தேவையான விரைவான நடவடிக்கைகளை எடுக்க வேண்டும் என்று மூதாட்டியின் உறவினர்களும் கிராம மக்களும் கோரிக்கை விடுத்துள்ளனர்.









