திருப்பத்தூர் மாவட்ட காவல்துறையின் 'சிங்கப்பெண் அதிரடிப்படை' சார்பில், பொதுமக்கள் மற்றும் மாணவ, மாணவிகளிடையே சட்ட விழிப்புணர்வை ஏற்படுத்தும் வகையில் பல்வேறு சிறப்பு நிகழ்ச்சிகள் நடத்தப்பட்டன.
இதன் ஒரு பகுதியாக, வாணியம்பாடி பேருந்து நிலையம், கிரிசமுத்திரம், லாலாஎரி மற்றும் மேட்டுப்பாளையம் உள்ளிட்ட முக்கியப் பகுதிகளில் விழிப்புணர்வுக் கூட்டங்கள் நடைபெற்றன. இந்நிகழ்ச்சிகளில், பெண்கள் மற்றும் குழந்தைகளுக்கான பாதுகாப்புச் சட்டங்கள், அவர்களின் அடிப்படை உரிமைகள் மற்றும் அவசர காலங்களில் காவல்துறையை அணுக வேண்டிய முறைகள் குறித்து விரிவாக விளக்கப்பட்டது.
மேலும், பெண்கள் மற்றும் மாணவ-மாணவிகள் தங்களுக்கு எதிராக நடக்கும் குற்றங்கள் அல்லது ஏற்படும் சிக்கல்கள் குறித்து எவ்வித அச்சமும் இன்றி புகார் அளிக்க முன்வர வேண்டும் என்றும், அரசு வழங்கும் சட்ட உதவிகளைத் தகுந்த முறையில் பயன்படுத்திக் கொள்ள வேண்டும் என்றும் காவல்துறையினர் அறிவுறுத்தினர்.
பொதுமக்கள் மற்றும் மாணவர்களிடையே பாதுகாப்பு மற்றும் சட்டம் குறித்த விழிப்புணர்வை மேம்படுத்தும் நோக்கிலேயே இந்தத் தொடர் நிகழ்ச்சிகள் முன்னெடுக்கப்பட்டுள்ளதாக திருப்பத்தூர் மாவட்ட காவல்துறை தெரிவித்துள்ளது.









