தமிழ்நாடு அரசுப் பணியாளர் தேர்வாணையத்தின் (TNPSC) அறிவிப்பின்படி, தமிழ்நாடு மின் பகிர்மானக் கழகத்தின் விழுப்புரம் மண்டல அலுவலகம் சார்பில், விழுப்புரம் மற்றும் கடலூர் வட்டங்களுக்கு உட்பட்ட 451 கள உதவியாளர் பணியிடங்களுக்கான உடற்தகுதித் தேர்வு மற்றும் சான்றிதழ் சரிபார்ப்புப் பணிகள் நாளை (நவம்பர் 11) தொடங்குகின்றன.
இதுகுறித்து விழுப்புரம் மின்வாரிய கண்காணிப்புப் பொறியாளர் வெளியிட்டுள்ள செய்திக்குறிப்பில் தெரிவிக்கப்பட்டுள்ளதாவது:
தேர்வு செய்யப்பட்டுள்ள விண்ணப்பதாரர்களுக்கான உடற்தகுதித் தேர்வு மற்றும் சான்றிதழ் சரிபார்ப்புப் பணிகள் நாளை 11.11.2026 முதல் வரும் 13.11.2026 வரை தொடர்ந்து நடைபெறவுள்ளது. இப்பணிகள் அனைத்தும் தினமும் காலை 7 மணி முதல் தொடங்கும்.
தேர்வு நடைபெறும் இடம்:
விழுப்புரம் - செஞ்சி நெடுஞ்சாலையில் அமைந்துள்ள பூத்தமேடு 230 கி.வோ துணை மின் நிலைய குடியிருப்பு வளாகத்தில் இந்தத் தேர்வுகள் நடத்தப்பட உள்ளன.
மேற்படி உடற்தகுதித் தேர்வானது, தமிழ்நாடு மின் பகிர்மானக் கழகத்தால் வழங்கப்பட்டுள்ள நிலையான அறிவுறுத்தல்கள் மற்றும் வழிகாட்டுதல்களின்படியே முழுமையாக நடத்தப்படும் என அந்த அறிவிப்பில் தெரிவிக்கப்பட்டுள்ளது.









