திருப்பத்தூர் மாவட்ட காவல் கண்காணிப்பாளர் அக்க்ஷய் அனில் வாகரே அவர்களின் உத்தரவின்பேரில், ஏலகிரி பகுதியில் பொதுமக்களிடையே சாலைப் பாதுகாப்பு குறித்த விழிப்புணர்வு நிகழ்ச்சி இன்று நடத்தப்பட்டது. இந்நிகழ்ச்சிக்கு ஏலகிரி காவல் ஆய்வாளர் திருமதி பாரதி தலைமை தாங்கி, பொதுமக்களுக்கும் வாகன ஓட்டிகளுக்கும் பல்வேறு பாதுகாப்பு வழிகாட்டுதல்களை வழங்கினார்.
அப்போது பேசிய அவர், "சாலைப் பாதுகாப்பு என்பது ஒவ்வொரு தனிமனிதனின் சமூகப் பொறுப்பாகும். நாம் காட்டும் சிறு கவனமும், போக்குவரத்து விதிகளைக் கடைப்பிடிக்கும் சுயக்கட்டுப்பாடும் விலைமதிப்பற்ற பல மனித உயிர்களை விபத்துகளில் இருந்து காக்கும்" என்று வலியுறுத்தினார்.
இந்நிகழ்ச்சியில் தலைக்கவசம் அணிந்து இருசக்கர வாகனம் ஓட்டுதல், கார் மற்றும் பிற நான்கு சக்கர வாகனங்களை இயக்குும்போது சீட் பெல்ட் அணிதல், அனுமதிக்கப்பட்ட வேகத்தில் வாகனங்களை இயக்குதல் மற்றும் மது அருந்திவிட்டு வாகனம் ஓட்டுவதை முற்றிலுமாகத் தவிர்த்தல் ஆகியவற்றின் அவசியம்பற்றி பொதுமக்களுக்கு விரிவாக எடுத்துரைக்கப்பட்டது.
'விபத்தில்லா திருப்பத்தூர்' என்ற இலக்கை எட்டும் நோக்கில் நடைபெற்ற இந்நிகழ்வில், ஏராளமான பொதுமக்களும், வாகன ஓட்டிகளும் மற்றும் காவல்துறை அதிகாரிகளும் கலந்துகொண்டு சிறப்பித்தனர்.









