திருவண்ணாமலை: உலக பிரசித்தி பெற்ற திருவண்ணாமலை அருணாச்சலேஸ்வரர் கோவிலில் ஐப்பசி மாத வளர்பிறை பிரதோஷ தினத்தை முன்னிட்டு, பெரிய நந்தி பகவானுக்கு சிறப்பு அபிஷேக ஆராதனைகள் வெகு விமரிசையாக நடைபெற்றன.
கோவிலின் ஐந்தாம் பிரகாரம் ஆயிரங்கால் மண்டபம் அருகே அமைந்துள்ள பெரிய நந்தி பகவானுக்கு இன்று சிறப்பு வழிபாடுகள் ஏற்பாடு செய்யப்பட்டன. இதையொட்டி மஞ்சள் தூள், விபூதி, குங்குமம், அபிஷேகப் பொடி, சீயக்காய், இளநீர், தேன், தயிர், சந்தனம், கரும்புச்சாறு மற்றும் 1,000 லிட்டர் பால் உள்ளிட்ட பல்வேறு சிறப்பு அபிஷேகம் நடத்தப்பட்டது.
அபிஷேகத்தைத் தொடர்ந்து, தாமரை, ரோஜா, கோழிக்கொண்டை, வில்வ இலை, தவணம், வெள்ளை மற்றும் மஞ்சள் சாமந்தி உள்ளிட்ட பல்வேறு வண்ண மலர்களால் நந்தி பகவானுக்கு பிரம்மாண்ட மாலைகள் சாற்றப்பட்டு, மகா தீபாராதனை காண்பிக்கப்பட்டது.
பிரதோஷ தினமான இன்று நடைபெற்ற இந்த சிறப்பு வழிபாட்டில் திருவண்ணாமலை மட்டுமின்றி பல்வேறு மாவட்டங்களில் இருந்தும் வருகை தந்த ஆயிரக்கணக்கான பக்தர்கள் கலந்துகொண்டனர். அவர்கள் 'அண்ணாமலையாருக்கு அரோகரா' என்ற பக்தி முழக்கத்துடன் நந்தி பகவானையும், அருணாச்சலேஸ்வரரையும் தரிசித்தனர்.
பிரதோஷ தினத்தில் நந்தி பகவானை மனதார வழிபட்டால், திருமணம் தடைபடுபவர்களுக்கு விரைவில் திருமணம் கைகூடும் என்றும், குழந்தை பாக்கியம் இல்லாத தம்பதியருக்கு புத்திரப்பேறு கிட்டும் என்பதும் பக்தர்களின் நம்பிக்கை ஆகும்.









