திருப்பத்தூர் மாவட்டம், திருப்பத்தூர் சக்தி நகரில் அமைந்துள்ள ஸ்ரீ முத்துமாரியம்மன் ஆலயத்தில், ஜீர்ணோத்தாரண அஷ்டபந்தன மகா கும்பாபிஷேக விழா இன்று வெகு விமரிசையாக நடைபெற்றது.
விழாவை முன்னிட்டு, கடந்த சில நாட்களாக விநாயகர் பூஜை, வாஸ்து சாந்தி, பிரவேச பலி மற்றும் யாகசாலை பிரவேசம் உள்ளிட்ட பல்வேறு சிறப்பு வழிபாடுகள் நடைபெற்றன. இன்று காலை, புனிதத் தலங்களில் இருந்து கொண்டுவரப்பட்ட புனித நீர் அடங்கிய கலசங்கள் யாகசாலையில் இருந்து ஊர்வலமாக எடுத்து வரப்பட்டன. வேத மந்திரங்கள் முழங்க, கோயில் கோபுரக் கலசங்கள் மற்றும் மூலவர் விமானக் கலசங்களின் மீது புனித நீர் ஊற்றப்பட்டு மகா கும்பாபிஷேகம் சிறப்பாக நடைபெற்றது.
இதனைத் தொடர்ந்து, ஸ்ரீ முத்துமாரியம்மன் மற்றும் பரிவார தெய்வங்களான ஸ்ரீ வள்ளி தெய்வானை சமேத சுப்பிரமணியர், ஸ்ரீ தர்மசாஸ்தா, ஸ்ரீ சதாசிவம், ஸ்ரீ தட்சிணாமூர்த்தி மற்றும் நவக்கிரகங்களுக்கு சிறப்பு அபிஷேகங்களும், அலங்காரங்களும் செய்யப்பட்டு மகா தீபாராதனை காண்பிக்கப்பட்டது. 'ஓம் சக்தி பராசக்தி' என்ற பக்தி முழக்கத்துடன் திரளான பக்தர்கள் அம்மனை தரிசித்து அருள்பெற்றனர்.
இந்நிகழ்ச்சியில் நகர்மன்ற உறுப்பினர் குட்டி என்கிற சீனிவாசன், சுந்தரேசன், வேலவன், ராஜா, அன்பழகன், கண்ணன், ரவீந்திரன், சம்பத், மோகன் உள்ளிட்ட முக்கிய பிரமுகர்களும், ஏராளமான பொதுமக்களும் கலந்து கொண்டனர். விழாவின் நிறைவாக, பக்தர்களுக்கு அன்னதானம் மற்றும் பிரசாதங்கள் வழங்கப்பட்டன.









