திருவண்ணாமலை அருணாசலேஸ்வரர் கோவிலில் நடைபெறவுள்ள கார்த்திகை தீபத் திருவிழாவிற்காக, ஆவின் நிறுவனத்திடம் இருந்து ரூ.36 லட்சம் மதிப்பிலான 4,500 கிலோ நெய் கொள்முதல் செய்யப்பட்டுள்ளது.
இந்த ஆண்டு கார்த்திகை தீபத் திருவிழா வரும் 15-ம் தேதி கொடியேற்றத்துடன் தொடங்குகிறது. தொடர்ந்து 10 நாட்கள் நடைபெறும் விழாவின் முக்கிய நிகழ்வான மகா தீபம், வரும் 24-ம் தேதி மாலை 6 மணிக்கு மலை உச்சியில் ஏற்றப்படுகிறது. இந்த மகா தீபத்திற்காக 4,500 கிலோ நெய் மற்றும் 1,500 மீட்டர் காடா துணி திரியாகப் பயன்படுத்தப்பட உள்ளது.
பக்தர்கள் நெய் காணிக்கை செலுத்துவதற்காக, கோவில் இணை ஆணையர் அலுவலகம் முன்பு பிரத்யேக கவுண்டரை இணை ஆணையர் பரணிதரன் சிறப்பு பூஜையுடன் இன்று தொடங்கி வைத்தார். பக்தர்கள் நேர்த்திக்கடனாக நெய் குடங்களை வழங்குவதுடன், பணமாகவும் காணிக்கை செலுத்தலாம். இதற்காக ஒரு கிலோ நெய் ரூ.600, அரை கிலோ ரூ.300 மற்றும் கால் கிலோ ரூ.150 என நிர்ணயிக்கப்பட்டுள்ளது. கவுண்டர் திறக்கப்பட்ட முதல் நாளே ஏராளமான பக்தர்கள் நீண்ட வரிசையில் காத்திருந்து நெய் காணிக்கை செலுத்தி வருகின்றனர்.









