கரூர் மாவட்டம் திருமுக்கூடலூர் காவிரி ஆற்றில் படகு இல்லம் அமைப்பது தொடர்பாக சுற்றுலாத்துறை அமைச்சர் ராஜேஷ்குமார், மாவட்ட ஆட்சியர் பிரசன்னா ராமசாமி, கரூர் நாடாளுமன்ற உறுப்பினர் ஜோதிமணி, கிருஷ்ணராயபுரம் சட்டமன்ற உறுப்பினர் சத்யா உள்ளிட்டோர் நேரில் ஆய்வு மேற்கொண்டனர்.
இதனைத் தொடர்ந்து, அப்பகுதியில் அமைந்துள்ள 1,500 ஆண்டுகள் பழமையான அகஸ்தீஸ்வரர் கோவிலில் நடைபெற்று வரும் புனரமைப்புப் பணிகள் குறித்து அமைச்சரும் அதிகாரிகளும் ஆய்வு செய்தனர். அப்போது, கோவிலின் ராஜகோபுரத்தைத் தாண்டி கோவில் வளாகத்திற்குள் அமைச்சரும், மாவட்ட ஆட்சியரும், நாடாளுமன்ற உறுப்பினரும், சட்டமன்ற உறுப்பினரும் செருப்பு அணிந்தபடி ஆய்வுப் பணியில் ஈடுபட்டது சர்ச்சையை ஏற்படுத்தியுள்ளது.
இதையடுத்து செய்தியாளர்களைச் சந்தித்த சுற்றுலாத்துறை அமைச்சர் ராஜேஷ்குமாரிடம், கோவில் புனரமைப்புப் பணிகளில் ஏற்படும் தாமதம் குறித்து கேள்வி எழுப்பப்பட்டது. அதற்கு பதிலளித்த அவர், 'அறநிலையத்துறை அமைச்சரின் கவனத்திற்கு எடுத்துச் சென்று பணிகள் விரைவுபடுத்தப்படும்' என்று கூறுவதற்குப் பதிலாக, 'சுற்றுலாத்துறை அமைச்சர் ரமேஷின் கவனத்திற்கு எடுத்துச் சென்று பணிகள் துரிதப்படுத்தப்படும்' எனத் தவறுதலாகக் குறிப்பிட்டார். தனது சொந்தத் துறையையும் அமைச்சரின் பெயரையும் மாற்றிப் பேசிய இந்த நாளிதழ் குழப்பம் தற்போது பெரும் பேசுபொருளாகியுள்ளது.









