முருகப்பெருமானின் 7வது படைவீடு என்று போற்றப்படும் சிறப்புமிக்க வயலூர் சுப்பிரமணியசுவாமி கோயிலில், பிரசித்தி பெற்ற கந்தசஷ்டி விழா இன்று ரக்ஷாபந்தனம் எனப்படும் காப்பு கட்டுதலுடன் கோலாகலமாகத் தொடங்கியது. இந்த விழா வரும் 16ஆம் தேதி வரை 7 நாட்களுக்குத் தொடர்ந்து நடைபெறுகிறது.
கந்தசஷ்டி விழாவையொட்டி, வள்ளி மற்றும் தெய்வானை சமேதராக காட்சியளித்த சுப்பிரமணியசுவாமிக்கு சிறப்புப் பூஜைகள், அலங்காரங்கள் மற்றும் லட்சார்ச்சனை நடைபெற்றது. விழாவின் முக்கிய நிகழ்வாக, நாளை (நவம்பர் 11) முதல் நவம்பர் 14 வரை தினந்தோறும் காலை 8 மணிக்கு சிங்காரவேலவர் பச்சை மயில், சேஷ, ரிஷப, அன்னம், வெள்ளி மயில் மற்றும் ஆட்டுக்கடா வாகனங்களில் எழுந்தருளி வீதி உலா வரும் நிகழ்ச்சி நடைபெறுகிறது.
தொடர்ந்து, வரும் நவம்பர் 14ஆம் தேதி இரவு சூரபதுமனுக்குப் பெருவாழ்வு அளிக்கும் வைபவமும், 15ஆம் தேதி காலை வேல் வாங்கும் நிகழ்ச்சியும், மாலையில் முக்கிய நிகழ்வான சூரசம்ஹாரமும் நடைபெறுகிறது. அதனைத் தொடர்ந்து, நவம்பர் 16ஆம் தேதி இரவு 7:00 மணிக்கு திருக்கல்யாண உற்சவம் வெகு விமரிசையாக நடைபெறவுள்ளது.
மற்ற முருகன் கோயில்களைப் போலன்றி, வயலூர் முருகன் கோயிலில் தொடர்ந்து 3 நாட்கள் சூரபதுமனுக்குப் பெருவாழ்வு அளிக்கும் நிகழ்ச்சி மிகவும் சிறப்பு வாய்ந்ததாகக் கருதப்படுகிறது. இவற்றுக்கான ஏற்பாடுகளை இந்து சமய அறநிலையத்துறை அதிகாரிகளும், கோயில் பணியாளர்களும் இணைந்து தீவிரமாகச் செய்து வருகின்றனர்.









