திருப்பத்தூர் மாவட்டம், வாணியம்பாடி அடுத்த வளையாம்பட்டு பகுதியைச் சேர்ந்தவர் மலர். குடும்பச் சூழல் காரணமாக ரூ. 50,000 அவசரத் தேவைக்காக, தன் வசம் இருந்த ஒரு சவரன் தங்க நகையை அடகு வைக்க முடிவு செய்துள்ளார். இதற்காக வளையாம்பட்டில் இருந்து வாணியம்பாடிக்கு அரசுப் பேருந்தில் அவர் பயணம் செய்துள்ளார்.
பின்னர், வாணியம்பாடி பேருந்து நிலையத்திற்கு வந்து இறங்கியபோது, தான் கொண்டு வந்த பையில் இருந்த ஒரு சவரன் தங்க நகை காணாமல் போயிருப்பதை கண்டு அவர் அதிர்ச்சியடைந்தார். நகையைத் தொலைத்த வேதனையில் அவர் பேருந்து நிலையத்திலேயே கதறி அழுதார்.
இதைக் கண்ட அங்கிருந்த பொதுமக்கள், உடனடியாக வாணியம்பாடி நகர காவல் நிலையத்திற்குத் தகவல் தெரிவித்தனர். தகவலின் பேரில் விரைந்து வந்த காவல்துறையினர், நகை திருடப்பட்டதா அல்லது தவறி விழுந்ததா என்பது குறித்து தீவிர விசாரணை நடத்தி வருகின்றனர்.









