திருப்பத்தூர் மாவட்டம், தோரணம்பதி அருகே உள்ள தனியார் பிளாட் பகுதியில் காரில் வந்த ஆண் மற்றும் பெண் இருவரும் மர்ம நபர்களால் சரமாரியாக வெட்டிக் படுகொலை செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தியுள்ளது.
சுமார் 45 வயது மதிக்கத்தக்க ஆண் மற்றும் 30 வயது மதிக்கத்தக்க பெண் ஆகிய இருவரும் வெங்கடேஸ்வரா என்ற தனியார் பிளாட்டிற்கு காரில் வந்துள்ளனர். அப்போது அவர்களைப் பின்தொடர்ந்து வந்த மர்ம நபர்கள், அரிவாள் உள்ளிட்ட ஆயுதங்களால் இருவரையும் சரமாரியாக வெட்டிவிட்டு அங்கிருந்து தப்பிச் சென்றுள்ளனர். இந்தத் தாக்குதலில் இருவரும் சம்பவ இடத்திலேயே பரிதாபமாக உயிரிழந்தனர்.
தகவலறிந்து விரைந்து வந்த திருப்பத்தூர் தாலுகா போலீசார், உடல்களைக் கைப்பற்றி பிரேதப் பரிசோதனைக்காக அரசு மருத்துவமனைக்கு அனுப்பி வைத்தனர். முதற்கட்ட விசாரணையில், கொலை செய்யப்பட்ட ஆண் திருவண்ணாமலை மாவட்டத்தைச் சேர்ந்த ஏழுமலையின் மகன் ரஞ்சித் (45) என்பது தெரியவந்துள்ளது. எனினும், அவருடன் வந்த பெண் யார் என்பது குறித்த விவரம் இதுவரை கண்டறியப்படவில்லை.
இந்த இரட்டைக் கொலைக்கான காரணம் குறித்து போலீசார் தீவிர விசாரணை நடத்தி வருகின்றனர். இருவருக்கும் இடையேயான தனிப்பட்ட விவகாரம் அல்லது முன்விரோதம் காரணமாக இந்தச் சம்பவம் நடந்திருக்கலாமா என்ற கோணத்திலும் போலீசார் விசாரணை மேற்கொண்டு வருகின்றனர். பட்டப்பகலில் நடைபெற்ற இந்தச் சம்பவம் அப்பகுதி மக்களிடையே பெரும் அதிர்ச்சியை ஏற்படுத்தியுள்ள நிலையில், தலைமறைவாக உள்ள மர்ம நபர்களைப் பிடிக்க தனிப்படை அமைத்து தீவிர தேடுதல் வேட்டை நடைபெற்று வருகிறது.









