நாமக்கல்லில் ஒரு கோடி ரூபாய் பணம் கேட்டு விவசாய சங்கத் தலைவர் கடத்தப்பட்ட வழக்கில், பிரபல வழக்கறிஞர் மீது அவதூறு பரப்பியதாகக் கூறி, விவசாய சங்கத் தலைவர் கோபாலகிருஷ்ணன் மீது நடவடிக்கை எடுக்கக் கோரி வழக்கறிஞர்கள் சங்கத்தினர் நாமக்கல் மாவட்ட காவல் கண்காணிப்பாளர் (எஸ்.பி) அலுவலகத்தில் புகார் மனு அளித்துள்ளனர்.
கள்ளக்குறிச்சியைச் சேர்ந்த கோபாலகிருஷ்ணன் (65), விவசாய சங்கங்களின் கூட்டு இயக்கத்தின் மாநில தலைவராகவும், ரியல் எஸ்டேட் தொழிலும் செய்து வருகிறார். கடந்த நவம்பர் 5-ஆம் தேதி, ஒரு கோடி ரூபாய் பணம் கேட்டு மர்ம கும்பலால் அவரும் அவரது கார் ஓட்டுநர் அஜ்மத்தும் கடத்தப்பட்டு, கடுமையாகத் தாக்கப்பட்டனர். இதுகுறித்து ராசிபுரம் காவல் நிலையத்தில் கோபாலகிருஷ்ணன் அளித்த புகாரின் அடிப்படையில், போலீசார் 9 பேரை கைது செய்தனர்.
இந்நிலையில், இந்த கடத்தல் வழக்கில் மேலும் 3 பேருடன் ஒரு வழக்கறிஞருக்கும் தொடர்பு உள்ளதாகவும், அவர்கள் மீது நடவடிக்கை எடுக்கக் கோரியும் கோபாலகிருஷ்ணன் நாமக்கல் எஸ்.பி அலுவலகத்தில் அண்மையில் மனு அளித்திருந்தார். இதற்கிடையே, நாமக்கல்லைச் சேர்ந்த பிரபல வழக்கறிஞர் அய்யாவு மீது அவதூறு ஏற்படுத்தும் வகையிலும், பொய்யான புகாரை அளித்துள்ள கோபாலகிருஷ்ணன் மீதும் உரிய நடவடிக்கை எடுக்கக் கோரி, நாமக்கல் அனைத்து வழக்கறிஞர்கள் சங்கத்தினர் எஸ்.பி கிரிஷ் யாதவ் அசோக்கிடம் புகார் மனு அளித்தனர்.
இதுகுறித்து நாமக்கல் குற்றவியல் வழக்கறிஞர் சங்கத் தலைவர் பாலசுப்பிரமணியம் செய்தியாளர்களிடம் கூறுகையில், "ராசிபுரத்தில் விவசாய சங்கத் தலைவர் கோபாலகிருஷ்ணன் கடத்தப்பட்ட வழக்கில் பார் கவுன்சில் உறுப்பினரும், பிரபல வழக்கறிஞருமான அய்யாவு மீது அவதூறு ஏற்படுத்தும் வகையில் கோபாலகிருஷ்ணன் பொய்யான புகார் அளித்துள்ளார். அவர் மீது களங்கம் விளைவிக்கும் கோபாலகிருஷ்ணன் மீது நடவடிக்கை எடுக்க வேண்டும் என வழக்கறிஞர்கள் சங்கம் சார்பில் எஸ்.பி அலுவலகத்தில் புகார் அளித்துள்ளோம். இதுகுறித்து மாவட்ட காவல் கண்காணிப்பாளர் உரிய நடவடிக்கை எடுப்பதாக உறுதியளித்துள்ளார்" என்றார்.









