திருவண்ணாமலை அருணாசலேஸ்வரர் திருக்கோவிலில் கார்த்திகை தீபப் திருவிழாவின் மூன்றாவது நாளான இன்று, சிறப்பு யாகசாலை பூஜைகள் நடத்தப்பட்டு 1008 சங்குகளில் புனித நீர் நிரப்பப்பட்டு அண்ணாமலையாருக்கு உச்சிகால வேளையில் மகா அபிஷேகம் விமரிசையாக நடைபெற்றது.
கார்த்திகை தீபத் திருவிழா கடந்த சில நாட்களுக்கு முன்பு கொடியேற்றத்துடன் தொடங்கிய நிலையில், தினசரி பல்வேறு வழிபாடுகளும் சிறப்பு பூஜைகளும் நடைபெற்று வருகின்றன. விழாவின் ஒரு பகுதியாக, இன்று கோவிலின் கருவறை முன்பு சிறப்பு யாகசாலை அமைக்கப்பட்டது. அங்கு வேத மந்திரங்கள் முழங்க 1008 சங்குகளில் புனித நீர் வைக்கப்பட்டு சிறப்பு பூஜைகள் மேற்கொள்ளப்பட்டன.
இதனைத் தொடர்ந்து, உச்சிகால வேளையில் யாகசாலையில் பூஜிக்கப்பட்ட புனித நீரைக் கொண்டு அண்ணாமலையாருக்குச் சிறப்பு அபிஷேகம் செய்யப் பட்டது. இதில் திரளான பக்தர்கள் கலந்துகொண்டு அரோகரா முழக்கத்துடன் சாமி தரிசனம் செய்தனர். அபிஷேகத்திற்குப் பிறகு, பக்தர்களுக்குப் புனித நீர் பிரசாதமாக வழங்கப்பட்டது.









