புதுக்கோட்டை: புதுக்கோட்டை வடக்கு ராஜவீதியில் உள்ள புகழ்பெற்ற முத்துப்பிள்ளை கேண்டீன் உணவகத்தின் உரிமையாளரும், முன்னாள் வார்டு கவுன்சிலரும், அதிமுக பிரமுகருமான கர்ணனுக்குச் சொந்தமான வீடு மற்றும் அலுவலகங்களில் வருமான வரித்துறை அதிகாரிகள் அதிரடி சோதனையில் ஈடுபட்டுள்ளனர்.
தொழிலதிபரான கர்ணன், பல முக்கிய தொழிலதிபர்களுடன் நெருங்கிய தொடர்பில் இருந்து வந்துள்ளார். கடந்த சில ஆண்டுகளுக்கு முன்பு மணல் தொழில் அதிபர்களான திண்டுக்கல் ரத்தினம் மற்றும் ராமச்சந்திரன் மீது வருமான வரித்துறை வழக்குப்பதிவு செய்து தீவிர விசாரணை நடத்தி வந்தது. இந்நிலையில், ராமச்சந்திரனின் உடல்நலக் குறைவு மற்றும் உறவினர்களின் வருகை காரணமாக அவரது வீடு மற்றும் அலுவலகங்கள் பூட்டப்பட்டிருந்தன.
இதற்கிடையே, தொழிலதிபர் ராமச்சந்திரனுடன் தொழில் ரீதியாக நெருக்கம் காட்டி வந்த கர்ணன், அவருக்கு பினாமியாக செயல்பட்டிருக்கலாம் என்ற சந்தேகத்தின் அடிப்படையில் இந்த சோதனை நடத்தப்பட்டுள்ளதாகக் கூறப்படுகிறது. புதுக்கோட்டை நகர்மன்ற வளாகத்தில் உணவகம் நடத்தி வரும் கர்ணன், அதன் மேல் பகுதியில் ரகசிய அலுவலகம் ஒன்றை அமைத்து அதன் மூலமாகவே அனைத்து வணிகத் தொடர்புகளையும் கையாண்டு வந்ததாகத் தெரியவருகிறது.
இந்த ரகசிய அலுவலகத்தில் வருமான வரித்துறையினர் மேற்கொண்ட சோதனையின் போது, பல்வேறு முக்கிய ஆவணங்கள் கைப்பற்றப்பட்டுள்ளதாகத் தகவல்கள் வெளியாகியுள்ளன. இந்த சோதனையின் முடிவிலேயே முறைகேடுகள் மற்றும் பணப் பரிமாற்றங்கள் குறித்த முழுமையான விவரங்கள் வெளிவரும் என எதிர்பார்க்கப்படுகிறது.









