தமிழகம் முழுவதும் நீதிமன்றத் தடையை நீக்கி, 4,724 செவிலியர் பணியிடங்கள் வெளிப்படையாக நிரப்பப்பட்டுள்ளதாகவும், விரைவில் 3,000 இதர மருத்துவப் பணியாளர்கள் நியமிக்கப்படவுள்ளதாகவும் மக்கள் நல்வாழ்வு மற்றும் மருத்துவத்துறை அமைச்சர் அருண்ராஜ் தெரிவித்துள்ளார்.
நாமக்கல் மாவட்டம் பரமத்தி அருகே கோனூரில் புதிதாகக் கட்டப்பட்ட தனியார் மருத்துவமனையைத் திறந்து வைத்துப் பார்வையிட்ட பின்னர் செய்தியாளர்களைச் சந்தித்துப் பேசிய அமைச்சர் அருண்ராஜ் இந்தத் தகவலை வெளியிட்டார்.
அப்போது அவர் மேலும் கூறியதாவது:
- தமிழக முதலமைச்சர் ஜோசப் விஜய் தலைமையிலான அரசு தொடர்ந்து பல்வேறு மக்கள் நலத் திட்டங்களைச் செயல்படுத்தி வருகிறது.
- நாமக்கல் மாவட்டத்தில் தொழில் வளர்ச்சியை மேம்படுத்தும் நோக்கில், லத்துவாடி பகுதியில் சிப்காட் அமைப்பதற்கான இடங்கள் ஆய்வு செய்யப்பட்டு, அப்பகுதியை நவீன தொழில் நகரமாக மாற்றுவதற்கான நடவடிக்கைகள் தீவிரமாக மேற்கொள்ளப்பட்டு வருகின்றன.
- நாமக்கல் மக்களின் நீண்ட நாள் கோரிக்கையான புதிய செவிலியர் கல்லூரி தொடங்குவதற்கான அறிவிப்பு நடப்பாண்டு பட்ஜெட்டில் வெளியிடப்பட்டுள்ளது.
- நாமக்கல் அரசு மருத்துவக் கல்லூரிக்குக் கூடுதல் மருத்துவர்கள் மற்றும் செவிலியர்கள் நியமிக்கப்படுவதுடன், மருத்துவர்களுக்காக பிரத்யேக விடுதியும் விரைவில் கட்டித் தரப்படும்.
- பழைய நாமக்கல் அரசு மருத்துவமனையில் பொதுமக்கள் பயன்படும் வகையில் 24 மணி நேரமும் செயல்படும் மருத்துவச் சேவை விரைவில் தொடங்கப்பட உள்ளது.
- தமிழகம் முழுவதும் காலியாக இருந்த 4,724 செவிலியர் பணியிடங்கள் நீதிமன்றத் தடையை நீக்கி, எவ்விதப் பரிந்துரைகளுக்கும் இடமின்றி, முற்றிலும் மதிப்பெண் அடிப்படையில் வெளிப்படையான முறையில் நிரப்பப்பட்டுள்ளன. மேலும், சுமாராக 3,000 இதர மருத்துவப் பணியிடங்களும் விரைவில் நிரப்பப்படவுள்ளன.
கட்சியில் நிலவும் சூழல் குறித்துப் பேசிய அமைச்சர், "கட்சியைப் பொறுத்தவரை நாங்கள் அனைவரும் முழுமையான ஒற்றுமையுடன் இருக்கிறோம். கட்சியில் எந்தவிதமான பூசலும் இல்லை. எங்களுக்கெல்லாம் ஒரே தலைவர் விஜய் மட்டுமே; அவரது வழிகாட்டுதலின்படியும் தலைமையின்படியும் மட்டுமே நாங்கள் அனைவரும் தொடர்ந்து செயல்பட்டு வருகிறோம்" என்று திட்டவட்டமாகத் தெரிவித்தார்.









