தமிழ்நாடு அரசு அனைத்துத் துறை ஊழியர் சங்கங்களின் போராட்டக் குழு ஆலோசனைக் கூட்டம் திருச்சியில் நடைபெற்றது. இக்கூட்டத்திற்கு, குழுவின் மாநில அமைப்பாளர் அண்ணா குபேரன் தலைமை வகித்தார்.
இந்தக் கூட்டத்தில், அரசு ஊழியர் சங்க மாநிலப் பொதுச்செயலாளர் சோமசுந்தரம், வணிகவரிப் பணியாளர் சங்க மாநிலப் பொதுச்செயலாளர் டேனியல் ஜெயசிங், ஊரக வளர்ச்சித் துறை அலுவலர் சங்க மாநிலச் செயலாளர் செந்தில்குமார், சத்துணவு ஊழியர் சங்க மாநிலச் செயலாளர் அல்போன்ஸா, இந்து சமய அறநிலையத் துறை அலுவலர் சங்கப் பொதுச்செயலாளர் தே.வாசுகி உள்ளிட்ட 63 துறைச் சங்கங்களின் நிர்வாகிகள் கலந்துகொண்டு விவாதித்தனர்.
பின்னர் செய்தியாளர்களிடம் பேசிய மாநில அமைப்பாளர் அண்ணா குபேரன், தமிழக ஆட்சியாளர்கள் அரசுத் துறைகளில் தனியார்மயத்தை விரைவாகப் புகுத்தி வருவதாகக் குற்றம் சாட்டினார். மேலும் அவர் கூறுகையில், இதனை அரசே அங்கீகரிக்கும் வகையில் 'ஓவர்சீஸ் மேன்பவர் கார்ப்பரேஷன்' (Overseas Manpower Corporation) நிறுவனம் நியமிக்கப்பட்டுள்ளது. இது அரசுப் பணி லட்சியத்துடன் படித்து வரும் லட்சக்கணக்கான இளைஞர்களின் எதிர்காலத்தைச் சிதைக்கும் செயலாகும். இந்தத் தனியார்மய நடவடிக்கையைக் கடுமையாக எதிர்க்கிறோம் என்றார்.
2015 சென்னை வெள்ளம் மற்றும் கரோனா பேரிடர் காலங்களில் நிரந்தர அரசு ஊழியர்கள்தான் மக்களைக் காப்பாற்றினர் என்பதை அரசு மறந்துவிடக் கூடாது என்று சுட்டிக்காட்டிய அவர், தேர்தல் வாக்குறுதியில் தெரிவித்தபடி பழைய ஓய்வூதியத் திட்டத்தை உடனடியாக அமல்படுத்த வேண்டும் என்பன உள்ளிட்ட 45 அம்சக் கோரிக்கைகளை வலியுறுத்தினார்.
இந்தக் கோரிக்கைகளை வலியுறுத்தி, வருகிற டிசம்பர் 4-ம் தேதி சென்னையில் தமிழக முதல்வர் விஜய்யை அனைத்துத் துறைச் சங்கங்களின் போராட்டக் குழு சார்பில் நேரில் சந்தித்துப் பெருந்திரள் முறையீடு வழங்க உள்ளோம். இதற்கான ஆயத்தப் பணியாக, வருகிற நவம்பர் 16-ம் தேதி முதல் 27-ம் தேதி வரை தமிழகத்தின் அனைத்து மாவட்டங்களிலும் உள்ள அரசு அலுவலகங்களுக்குச் சங்கத் தலைவர்கள் குழு நேரில் சென்று தீவிரப் பிரச்சாரம் மேற்கொள்ள உள்ளது என அவர் அறிவித்தார்.









