கர்நாடக மாநிலத்தின் மேகதாது பகுதியில் அணை கட்டியே தீருவோம் என அம்மாநில முதலமைச்சர் டி.கே. சிவக்குமார் தெரிவித்த கருத்துகளுக்கு எதிர்ப்பு தெரிவித்து, நாகை மாவட்டம் கீழ்வேளூரில் விவசாயிகள் ஆர்ப்பாட்டத்தில் ஈடுபட்டனர். காவிரி விவசாயிகள் பாதுகாப்பு சங்கம் மற்றும் தமிழ்நாடு விவசாய சங்கங்களின் கூட்டு இயக்கம் சார்பில் நடைபெற்ற இப்போராட்டத்தில், கர்நாடக முதலமைச்சரின் உருவப்படம் எரிக்கப்பட்டது.
முன்னதாக, பிரதமர் நரேந்திர மோடி கலந்துகொண்ட விழாவில் பேசிய கர்நாடக முதலமைச்சர் டி.கே. சிவக்குமார், மேகதாது அணை விவகாரத்தில் தமிழகத்திற்கு தண்ணீர் வழங்கப்பட மாட்டாது என்றும், அணை கட்டும் பணியை தீவிரப்படுத்துவோம் என்றும் பகிரங்கமாகப் பேசியிருந்தார். இந்த பேச்சு தமிழக விவசாயிகள் மத்தியில் கடும் கொந்தளிப்பை ஏற்படுத்தியுள்ளது.
இதனைக் கண்டித்து கீழ்வேளூர் கடைத்தெருவில் திரண்ட விவசாயிகள், கர்நாடக முதலமைச்சருக்கு எதிராகவும், மேடையில் மௌனம் காத்ததுடன் முறையான நடவடிக்கை எடுக்காத மத்திய அரசைக் கண்டித்தும் முழக்கங்களை எழுப்பினர். காவிரி நீர் விவகாரத்தில் தமிழக விவசாயிகளின் உரிமைகளைப் பாதுகாக்கத் தவறிவிட்டு, மத்திய மற்றும் மாநில அரசுகள் தொடர்ந்து மௌனம் காத்தால், தமிழகம் முழுவதும் உள்ள விவசாயிகளை ஒருங்கிணைத்து அனைத்து மாவட்டங்களிலும் மிகப்பெரிய போராட்டங்கள் வெடிக்கும் என்று விவசாயிகள் எச்சரித்துள்ளனர்.









