அரியலூர் மாவட்டம், உடையார்பாளையத்தில் உள்ள புகழ்பெற்ற ஸ்ரீ பாலமுருகன் சுவாமி கோவிலில், கந்த சஷ்டி விழாவின் முக்கிய நிகழ்வான சூரசம்ஹார விழா பல்லாயிரக்கணக்கான பக்தர்கள் முன்னிலையில் வெகு விமரிசையாக நடைபெற்றது.
உடையார்பாளையம் தெற்கு தட்டார் தெருவில் அமைந்துள்ள இக்கோவிலில், இந்த ஆண்டுக்கான கந்த சஷ்டி விழா கடந்த நவம்பர் 10-ம் தேதி கொடியேற்றத்துடன் தொடங்கியது. விழா நாட்களில் தினமும் சிறப்பு பூஜைகள், அபிஷேகங்கள் மற்றும் தீபாராதனைகள் நடைபெற்று வந்தன.
விழாவின் சிகர நிகழ்ச்சியான சூரசம்ஹாரம் இன்று நடைபெற்றது. இதையொட்டி, அதிகாலையில் வேத மந்திரங்கள் முழங்க யாகசாலை பூஜைகள், சஷ்டி ஹோமம் மற்றும் சிறப்பு அபிஷேகங்கள் நடைபெற்றன. மாலையில், முருகப்பெருமான் சூரபத்மனை வதம் செய்யும் சூரசம்ஹார நிகழ்வு பக்தர்களின் 'வெற்றிவேல், வீரவேல்' கோஷங்களுக்கு இடையே நடைபெற்றது.
வெள்ளை நிறப் பட்டாடை அணிந்து, கையில் வேல் ஏந்தி, சேவல் கொடியுடன் ஆட்டுக்கிடா வாகனத்தில் எழுந்தருளிய ஆறுமுக சுவாமி, பக்தர்களுக்கு அருள்பாலித்தார். அன்னை ஆதிபராசக்தியிடம் இருந்து வேல் பெறும் வைபவமும், வீரபாகு சுவாமியுடன் போருக்குப் புறப்படும் உற்சவமும் சிறப்பாக நடைபெற்றன. சூரபத்மனை வதம் செய்யும் நிகழ்வைக் கண்ட பக்தர்கள் பக்தி பரவசத்தில் ஆழ்ந்தனர். விழாவின் நிறைவாக, சுவாமி கோவிலின் உட்பிரகாரத்தில் வலம் வந்து பக்தர்களுக்கு அருள்பாலித்தார். உடையார்பாளையம் மற்றும் அதன் சுற்றுவட்டாரப் பகுதிகளில் இருந்து திரளான பக்தர்கள் கலந்து கொண்டு முருகப்பெருமானை வழிபட்டனர்.









