நடிகர் தனுஷ் நடிப்பில் உருவாகியுள்ள 'ஓம்' திரைப்படம் வரும் 20-ஆம் தேதி உலகம் முழுவதும் திரையரங்குகளில் வெளியாகவுள்ளது. இந்நிலையில், மயிலாடுதுறை மாவட்டத்தில் அவரது ரசிகர்கள் சுவரொட்டிகளில் அவரை 'நாளைய முதல்வர்' எனக் குறிப்பிட்டு எழுதியுள்ள வாசகங்கள் தமிழக அரசியல் மற்றும் திரைத்துறையில் பெரும் விவாதத்தை ஏற்படுத்தியுள்ளன.
நடிகர் தனுஷ் தனது ரசிகர் மன்றத்தை மறுசீரமைத்து, 'தனுஷ் நற்பணி இயக்கம்' எனப் பெயர் மாற்றம் செய்துள்ளார். தொகுதி வாரியாக ரசிகர்களை ஒருங்கிணைப்பது மற்றும் கடந்த அக்டோபர் மாதம் சென்னையில் மகளிர் ரசிகர்களைச் சந்தித்து நலத்திட்ட உதவிகளை வழங்கியது போன்ற அவரது சமீபத்திய செயல்பாடுகள், அவர் அரசியலில் களமிறங்கத் தயாராகி வருவதற்கான அறிகுறியாகப் பார்க்கப்படுகின்றன.
மயிலாடுதுறை மாவட்டம், தரங்கம்பாடி தாலுகாவிற்கு உட்பட்ட திருக்கடையூர் மற்றும் பொறையார் பகுதிகளில், மாவட்டத் தலைமை நற்பணி இயக்கச் செயலாளர் ஏ.சி.ஆர். சிவா தலைமையில் இந்தச் சுவர் விளம்பரங்கள் எழுதப்பட்டுள்ளன. அதில், 'நாளைய முதல்வர் தனுஷ் நடிக்கும் ஓம் திரைப்படம் வெற்றி பெற வாழ்த்துகிறோம்' எனப் பொறிக்கப்பட்டுள்ளது.
தமிழக அரசியலில் நடிகர் விஜய்யின் அரசியல் பிரவேசத்திற்குப் பிறகு, தனுஷின் பெயரும் அரசியல் வட்டாரங்களில் அடிபடத் தொடங்கியுள்ளது. இருப்பினும், இது வெறும் திரைப்பட விளம்பர யுக்தியா அல்லது அவரது எதிர்கால அரசியல் வருகைக்கான முன்னோட்டமா என்ற கேள்வி எழுந்துள்ளது.









